Год заснавання: 1961

Стадыён: Тарпеда (6524)

Колеры: чорна-белыя

Дырэктар: Аляксандр Пугач

Тытулы: уладальнік Кубка Беларусі (2015/2016, 2022/2023), уладальнік Cуперкубка Беларусі (2024).

Дасягненні: фіналіст Кубка Беларусі (2009/2010); фіналіст Суперкубка Беларусі (2011; 2017)

Самыя буйныя перамогі: 6:1 ( «Славія», 2005 г.), 5:0 ( «Лакаматыў-96» 2002; «Нёман» 2003; МТЗ-РІПА 2004)

Самая буйная параза: 1:8 ( «Дынама», 1992; «Беларусь», 1992/1993)

Найбольшая колькасць матчаў у чэмпіянатах: Андрэй Дзівакоў - 144

Лепшы бамбардзір у чэмпіянатах: Юрый Мархель - 33

Лепшы бамбардзір за сезон: Сяргей Шэўчык - 21 (2001).

Самы карысны ў чэмпіянатах: Юрый Мархель - 41 (33+8)

Самы карысны за сезон: Юрый Мархель - 21 (17+4, 2002)

Усе назвы клуба: «Ракета» (1961-1967); «Аўтазаводзец» (1967-1969); «Тарпеда» (1969-1988); БелАЗ (1989-1992), «Тарпеда» (1993-2011), «Тарпеда-БелАЗ» (з 2011 па цяперашні час)

Самабытная каманда з Жодзіна прымала ўдзел у першых двух чэмпіянатах ў вышэйшай лізе, але ў 1994 годзе пакінула першы дывізіён на доўгіх 9 сезонаў. Вяртанне адбылося ў 2002 годзе пад кіраўніцтвам харызматычнага трэнера Якава Шапіра, які, мабыць, для «Тарпеда» быў больш, чым проста трэнер. У 2004 годзе яго не стала. Справу працягнулі яго вучні. У сезонах 2004, 2005 гадоў у руля знаходзіўся Юрый Малееў і аўтазаводцы як ніколі былі блізкія да бронзавых медалёў, але канцоўка склалася не на іх карысць. У 2010 годзе жодзінцы дайшлі да фіналу Кубка краіны, у якім буйна саступілі суседзям з барысаўскага БАТЭ з лікам 0:5. Тым не менш гэты фінал даў «аўтазаводцам» права ўпершыню прыняць удзел у еўракубках. Выйшла нядрэнна. Прайшоўшы ісландскі «Філкір», «Тарпеда» мінімальна саступіла сербскаму ОФК (2:2 - у гасцях, 0:1 - дома). А праз шэсць гадоў аўтазаводцам удалося ўзяць рэванш у суседзяў і заваяваць Кубак Беларусі дзякуючы перамозе ў серыі пасляматчавых пенальці. У 2020 годзе каманда пад кіраўніцтвам Юрыя Пунтуса ўпершыню ў гісторыі ўзышла на п'едэстал, заваяваўшы бронзавыя медалі «Беларусбанк - Вышэйшай лігі».

У 2023 годзе, ужо пад кіраўніцтвам Дзмітрыя Молаша, клуб паўтарыў свой бронзавы поспех, а таксама, што немалаважна, стаў уладальнікам Кубка Беларусі. Сезон 2024 года пачаўся для клуба новым трафеем - у матчы за Суперкубак краіны ў серыі пенальці жодзінцы аказаліся мацнейшымі за мінскае Дынама. Па выніках года, аднак, падапечныя Дзмітрыя Молаша фінішавалі на ўжо звыклым для сябе трэцім месцы ў чэмпіянаце.